Azərbaycandakı Amerika ticarət palatası illik iclasını keçirərək, yeni prezident və direktorlar şurasına altı yeni üzv seçib.

Gün.Az-ın verdiyi xəbərə görə, “Ernst & Young” şirkətinin Azərbaycandakı idarəedici tərəfdaşı İlqar Vəliyev Amerika ticarət palatasının Azərbaycandakı prezidenti seçilib.

Bildirək ki, İlqar Vəliyev 2007-ci ilin mart ayından Amerika Ticarət Palatasının direktorlar Şurasının fəal üzvüdür. Bu müddət ərzində Vəliyev AMCHAM-da bir sıra rəhbər vəzifələr tutub: 2009-cu ilin aprelindən vitse-prezident, 2010-cü ilin noyabrından – birinci vitse-prezident. 2012-ci ilin dekabr ayından etibarən, İlqar Vəliyev Amerika Ticarət Palatasının prezidenti səlahiyyətlərinin icraçısı qismində çıxış edib.

İ.Vəliyevlə birgə, direktorlar şurasına yeni seçilmiş üzvlər – KPMG Azərbaycandakı idarəedici tərəfdaşı Vüqar Əliyev, Golden Pay şirkətinin təsisçisi və baş direktoru Fərid İsmayılzadə, Baker & McKenzie-CIS Limited şirkətinin tərəfdaşı Gündüz Kərimov, Azerfon (Nar Mobile ticarət nişanı) şirkətinin baş direktoru Kent Makneli, BP şirkətinin Azərbaycanda əməliyyatlar üzrə vitse-prezidenti Mark Cey-Tomas, Chevron şirkətinin Azərbaycandakı regional meneceri Erik Uolker və şuranın hazırkı üzvləri – PwC şirkətinin Azərbaycandakı idarəedici tərəfdaşı Mövlan Paşayev, Societe Generale-ın Azərbaycandakı nümayəndəliyinin başçısı Teybə Quliyeva və “Deloitte” şirkətinin Azərbaycandakı idarəedici tərəfdaşı Nuran Kərimov daxil ediliblər.

Qeyd edək ki, Azərbaycanda Amerika Ticarət Palatası, Azərbaycanda biznes maraqlarını dəstəkləyən və təşviq edən özəl, qeyri-kommersiya biznes assosiasiyasıdır. 1996-cı ildə yaradılan AMCHAM Azərbaycan iqtisadiyyatının bütün sektorlarında fəaliyyət göstərən 250 tam üzv və tərəfdaşı özündə birləşdirir. AMCHAM Azərbaycanda bütün xarici investisiyaların 80 faizini və yerli investisiyaların əhəmiyyətli hissəsini təmsil edir.

http://www.gun.az/economy/66069

News from http://www.gun.az